Titiriberia continúa martes en Rianxo cunha xornada centrada na figura de Toribio de Mañón

Rianxo, 25 de xullo de 2022.- O Titiriberia. Olladas sobre os cristovos, festival de títeres tradicionais, organizado pola asociación Morreu o Demo coa colaboración do Concello de Rianxo, da Deputación da Coruña e da Xunta de Galicia, continúa mañá martes 26 de xullo cun novo espectáculo de Viravolta Títeres. A compañía representará ás 21.00 horas na praza Rafael Dieste o seu espectáculo Vida, crimes e prisión de Toribio de Mañón. Nesta peza, retrátanse as andainas que lle deron sona a Mamede Casanova co sobrenome de Toribio de Mañón, famoso bandoleiro galego de comezos do século XX. Na historia deste personaxe inspirouse Valle-Inclán para escribir Las galas del difunto. Tras a función, a compañía manterá un encontro co público. Xusto unha hora antes, no mesmo espazo, ás 20.00 h. o investigador José Luís do Pico Orjais ofrecerá unha conferencia que, baixo o título de A viaxe de Toribio: de Mañón a Rianxo?, versará sobre esta figura histórica que deveu en lenda que acabou por protagonizar unha cantiga popular e por darlle nome ao meco que protagoniza o Entroido local.

Programación mércores

O mércores a programación de Titiriberia continuará adiante coas actuacións de seis compañías diferentes e a conferencia coa que se conmemorará máis de corenta anos de teatro profesional de marionetas en Galicia. Entre as 12 e as 14.30 horas, a Praza Castelao e o Subcampo contarán coas actuacións dos espectáculos coa técnica de lambe-lambe de Diáspora Teatro, que representará a peza Victoria; Os Monicreques de Kukas, que fará o propio con Guernika, e Seisdedos Marionetas, que ofrecerá a súa obra Este espectáculo foi ilegal. O mércores tamén chegará o primeiro nome internacional do Titiriberia deste 2022. Será a compañía lusa Teatro e marionetas de Mandrágora, que amosará entre as 12.00 horas e as 14.30 horas o primeiro pase do seu espectáculo itinerante O máis maior grande Dom Roberto. Xa pola tarde, entre as 18.00 e as 20.00 horas, celebrarase unha nova quenda que partirá tamén da Praza Castelao. A xornada rematará cunha mesa redonda ás 18.30 horas no Auditorio de Rianxo no que participarán representantes de Os Monicreques de Kukas, Tanxarina, Viravolta Títeres e Trécola para falar das catro décadas de teatro de títeres profesional en Galicia e cun espectáculo ás 21.30 horas que terá lugar no Auditorio de Rianxo: Eva, da formación andaluza Trastero 203.

30 compañías e artistas

O Festival Titiriberia na súa sétima edición traerá a Rianxo a máis de trinta compañías, formacións e artistas do teatro de títeres tradicionais para ofrecer os seus espectáculos, participar nas mesas redondas, impartir os cursos de formación a profesionais ou acompañar a cativada nos obradoiros de construción de bonecos que se insiren no programa dos Campamentos de conciliación do Concello de Rianxo. Este ano, o encontro rianxeiro recupera tras dous anos de crise sanitaria a súa dimensión internacional ao contar coa participación de artistas e investigadoras procedentes de México, Italia e Portugal.

Programa completo