Achegamos o texto íntegro do Cantar do Ano de Rianxo que interpretou Seisdedos Marionetas Tradicionais no Titiriberia 2026 e que se desenvolveu en colaboración coa AC Morreu o Demo
Que se faga xa o silencio
como se pasase un anxo
que agora imos repasar
o que aconteceu en Rianxo
Vimos outra vez este ano
que é ano de carallada
ou para que fique máis claro
un ano de Trumpallada
Este ano foi tranquilo
non mo tomedes a mal
pasarom ben menos cousas
que en Venezuela ou Irán
Ainda que tal como andamos
Calquer dia xa nos toca
e aparece por aí Trump
a apañar unhas miñocas
que a Trump non hai quen o coute
e non nos deixa descanso
aínda ha aparecer
calquer día por Rianxo
que como é cabezudo
e ten moita gana de leria
calquer día ímolo ver
abrindo o Titiriberia
Porque para levar ameixas
berberecho ou longueirón
estache a cousa ben crúa
non se apaña un patacón
E para rematar a cousa
e fodernos bem a todos
aló pola Illa de Sálvora
disque van botar uns lodos
A este paso e como andamos
sen miralo no zodiaco
xa digo que das bateas
só se vai sacar tabaco
E seica por Taragoña
Un perruqueiro parava
Que sempre che perguntaba
Queres que che faga raia?
Que nesta perrucaria
Eran autenticos xenios
toda a caspa que caía
ia pra engordar o xénero
Disque anda por Tanxil
Nova caste de sardiñas
Teñen cairos teñen serdas
E asustan ás veciñas.
Que xabalis haiche moitos
de catro e de dúas patas
ás vezes fai mais destrozos
o que bebeu unhas latas
Pero teñen por diante
Un pobo que é do mellor
Se non mirade as veciñas
Que atraparon un ladrón
Somos refuxio climático
e seguen a vir turistas
coa auga quente da praia
San Air Bnb nos asista
Que somos hospitalarios
pero andamos apertados
nas festas xa só dá o sítio
para bailarmos agarrados
A mocidade non para
e mirade vós que leria
ata andan de primeiros
na liga B de trainheiras
Non todo che son desgrazas
Para a xente do montón
Algún houbo aquí en Rianxo
Que levou o euromillón
Por como anda o gasoil
Imos a pasar apuros
Ainda haberá que entenderse
Coa trama de hidrocarburos
E non che foi pouca cousa
no medio de tanta trupe
Que nos trouxeron de volta
A Virxe de Guadalupe
Seica lle andan a facer
um lifting ao hórreo de Araño
que é o mais grande do país
a ver se xa fica claro
A ver se despois do hórreo
Amañanlle a casa a Dieste
Castelao, Manuel Antonio
non teñen museo que preste
E tamén temos fechado
Este pazo do Martelo
E o museo do mar en obras
Isto dá peniña velo
e se me permiten vostedes
collo a pucha e vou marchar
que me chegaron co conto
que o Trump me anda a buscar
Ou sexa que aquí acabamos
Ogallá gustase a leria
fiquen vostedes atentos
Que segue o Titiriberia
