A compañía de Maese Seisdedos, cego e monicrequeiro ambulante, realiza as súas representacións usando a técnica tradicional do bululú na que o lazarillo manipulaba os bonecos oculto na capa do cego que tocaba a zanfona.

Representará contos medievais e populares, romances históricos, romances de cego, pequenas pezas teatrais, cancións tradicionais e contos e narracións da literatura galega.

Sidulfo traballa día e noite para un home sen corazón que nin vive nin deixa vivir, até que aparece un aposto e elegante diaño cunha máxica proposta que solucionará todos os seus problemas.

Un espectáculo teatral con entremeses, no que un presentador tentará levar o fío da historia librándose dun espectador que non consegue atopar o seu lugar no teatriño.

Nun contexto humorístico e divertido, a raposa e o lobo vense envoltos nun conflito pola propiedade dunha pereira con sete peras, á que misteriosamente lle van desaparecendo as peras unha a unha.

No texto vense cuestionados os roles habituais que teñen a raposa e o lobo na cultura galega de tradición oral; os dous vólvense vexetarianos, son rexeitados polos seus grupos habituais de compañía e acaban sendo compañeiros a causa do amor pola pereira coas sete peras. Todo isto, acompañados das características humorísticas clásicas da tradición de monicreques galega: os enredos lingüísticos, a cachaporra, a astucia do heroe e do antiheroe…

Seu Biu é un vello brincador que non deixa que a súa idade nin a morte poñan fin á súa alegría de vivir. A pesar de vivir só e ser obxecto de moitas críticas e envexas, vive sorrindo e bailando, feliz e despreocupado. Ten música, danza e, sobre todo, unha forte conciencia da súa profunda conexión coa natureza. Un día, a Morte decide buscalo. Pero cando chega á casa do ancián, é recibida dun xeito totalmente inesperado…

A compañía galego-exipcia emprega a antiga técnica das sombras chinesas para pór en escena esta orixinal historia en portugués.

Un espectáculo de monicreques de luva no que se conxuga a tradicional estilo da cachaporra cuns caracteres e aconteceres renovados para o público de hoxe en día. Na obra, a Marina encantaríalle viaxar polo mundo adiante. Un día Moncho chega a porto no seu veleiro Ovos con patacas mais, nun descoido, o pirata Ollo Virollo toma prestada a nave e faise ao mar… cumprirá Marina o seu soño de dar volta ao planeta?

Nun formato pensado especialmente para actuacións na rúa e cun sinxelo e eficaz guión, uns personaxes de marcado carácter e un ritmo trepidante, Mircromina fai a súa contribución á renovación deste xénero dramático para goce de todos os públicos.

O 18 de xullo de 1984, o Piccolo Teatro de Milán levou a escena o seu Arlecchino servitore dei due padroni, durante o “Olympic Arts Festival” en Los Ángeles, nos Estados Unidos de América. Á volta, o barco que transportaba os colectores coa escenografía, vestiario, atrezzo e demais viuse inmerso nunha terrible tormenta no medio do océano. Non houbo vítimas nin graves danos para a nave, pero o barco perdeu parte da mercancía no mar…

Máscaras, contos, música en directo, acrobacia e acción trepidante fúndense nun interesante exercicio de interpretación que nos revelará os máis profundos segredos da Commedia dell’Arte

A compañía Alakrán reproducirá números habituais nas feiras de antano e inspirarase nos números que desenvolvía a familia Silvent ante a porta para atraer o público co fin de animar a entrada ao espectáculo de varietés. Coa súa gaita e con números de monicreques á planchette, interactuará co público ao máis puro estilo das feiras tradicionais.

Esta proposta escénica é unha iniciativa do festival Titiriberia que pretende reproducir, desde unha óptica actual, o espectáculo que a familia Silvent realizaba na súa barraca e no que estaba incluída a peza de Barriga Verde. Canción melódica, malabares, marionetas, equilibrismo e números de clown sucederanse nun ambiente de cabaré orientado ao público adulto.

Números de clown, Participarán Larraitz Urruzola, Títeres Alakrán, Rafa Rey, Tero Rodríguez, Lucho Penabade e a artista de clown Malala. Todo conducido pola actriz e cantante Iria Pinheiro e acompañado de música ao vivo cun cuarteto da Escola de Música de Rianxo, coordinado por Bernal Muíños.

O espectáculo Retro Contes, artellado a partir de textos de Gianni Rodari, mestura proxeccións, manipulación de monicreques e traballo actoral sobre o escenario.

A historia dun pai e da súa filla separados polo traballo e que manteñen a súa relación a base de contos, convida ás familias a unha reflexión sobre a importancia das historias para manter a humanidade nun mundo opresivo.

Unha feira onde nada se vende, onde as sementes se trocan por outras, por un conto, un refrán, unha canción ou unha adiviña.

Mirari, unha vasca afincada en Galiza, percorre o país coa súa Feira das sementes. No seu postiño leva para trocar semente das fabas de Tolosa, de trigo candeal e outros cereais. Ela dá, mais tamén recolle. Nesta ocasión, en troca dunhas sementes de roseira e de garavanzo, representará con marionetas os contos A proba da semente e Garavanciña e o esquío.

Finalmente, para denunciar o secuestro que algunhas multinacionais da alimentación fan das sementes, representará con monicreques de cachaporra O rapto do centeo.

Unha reflexión xeral sobre o personaxe e o seu esquecemento. A historia dos Silvent, a importancia das feiras, o patrimonio inmaterial ou a tradición dos títeres europeos.

Exposición en paneis sobre a xenealoxía de Barriga Verde e os títeres europeos. Pulchinella, Punch, Guignol, Kasper; todos os representantes internacionais desta familia preséntanse nunha serie de paneis contextualizándoos e explicando a súa evolución e diferenzas.

Quen foi a familia que levou a Barriga Verde polas feiras de Galiza? De onde viñan, e como gañaban a vida?

Nesta exposición déitase algo de luz sobre as persoas que estiveron detrás do derradeiro expoñente do teatro popular de títeres no noso país, tentando así rendir homenaxe ao oficio das persoas titiriteiras e artistas ambulantes.